Unai Elorriaga Lopez de Letona Bilbon jaio zen 1973an. Algortan bizi izan da beti eta Deustuko Unibertsitatean egin ditu Filologia ikasketak. Hainbat urte eman zituen Labayru Ikastegian mota guztietako lanetan: irakasle (Hizkuntza eta Literatura), zuzentzaile, ikertzaile, itzultzaile... Horrezaz gainera, urtebete eman zuen Giltza-Edebé argitaletxean testu-liburuak sortzen eta itzultzen.

2002an Espainiako Narratibako Sari Nazionala irabazi zuen eta 2003. urtetik hona idazle lanetan dihardu. Hiru nobela argitaratu ditu, umeentzako ipuin luze bat, euskal literaturari buruzko testu-liburu bat eta hainbat ipuin eta artikulu aldizkari zein egunkarietan (Berria, El País, Idatz & Mintz...). Munduko hainbat unibertsitatetan eman izan ditu hitzaldiak eta bere liburuak hamar bat hizkuntzatan daude argitaratuta.